ZAIDI YA BIL.48 ZAKISIWA KUTEKELEZA MIRADI YA MAENDELEO KASULU

Posted on: February 23rd, 2019

Baadhi ya Viongozi  walioshiriki Mkutano wa Baraza kujadili makisio ya Bajeti kwa Mwaka wa Fedha 2019/202. Kutoka Kushoto ni Katibu wa CCM(W) Ndg.Mashaka  Mshora, Mkuu wa Wilaya ya Kasulu Kan. Simon Anange, Diwani Kata ya Rusesa Mhe. Fabiano Doragi, Mwenyekiti wa Halmashauri Mhe. Yohana Mshita, Mkurugenzi wa Halmashauri ya Kasulu Mha. Godfrey Kasekenya  mwishoni  ni Mhe.Josephine Genzabuke Mbunge viti Maalum Mkoa wa Kigoma.

Mkurugenzi wa Halmashauri ya wilaya ya Kasulu Mha. Godfrey Kasekenya(kulia) Mwenyekiti wa Halmashauri Mh.Yohana Mshita (katikati) na Diwani wa Kata ya Rusesa Mh. Fabiano Doragi wakiwa katika Picha ya pamoja kabla ya kuanza Mkutano wa Baraza kujadili Bajeti  kwa Mwaka 2019/2020.Baadhi ya Wah. Madiwani wakifuatilia uwasilishwaji wa makisio ya Bajeti ya Halmashauri ya wilaya ya Kasulu kwa Mwaka 2019/2020 kwenye Ukumbi wa Halmashauri.

Na.Andrew Mlama.

Baraza la Madiwani wa Halamshauri ya wilaya ya Kasulu Mkoani Kigoma limepitisha Mapendekezo ya Bajeti ya mwaka wa fedha wa 2019/2020 yenye makisio ya  zaidi ya Shilingi bilioni 48.8 kwa ajili ya utekelezaji wa miradi mbalimbali ya Maendeleo.

Akiwasililisha Bajeti hiyo, Afisa Mipango Takwimu na ufuatiliaji  wa halmashauri Ndg. Jackob Kilatu, amesema ili kukidhi mapendekezo hayo halmshauri inatarajia kukusanya kiasi hicho cha Fedha kutoka Serikali kuu na vyanzo mbalimbali vya  Mapato ya ndani ya halmashauri hiyo pamoja na wadau wa maendeleo.

Bajeti hiyo imejielekeza zaidi katika Elimu Afya na Maji kwa kukamilisha miradi ambayo iliyoanza kutekelezwa na haijakamilika pamoja na miradi mipya iliyoibuliwa na wananchi katika kata 21 za halmashauri.