WATUMISHI KASULU DC WAMETAKIWA KUTEKELEZA MAJUKUMU YAO YA KILA SIKU KATIKA MFUMO WA PEPMIS

Posted on: May 20th, 2024

Na Mwandishi Wetu 

Serikali imewataka watumishi wa Halmashauri ya Wilaya ya Kasulu kuhakikisha wanatekeleza majukumu yao  ya kila siku katika mfumo mpya wa Usimamizi wa Utendaji  Kazi katika Utumishi wa Umma (PEPMIS).

Hayo yamebainishwa  wilayani Kasulu mkoani Kigoma na  Victoria Panga  kutoka  Ofisi ya Rais Utumishi kwenye mafunzo  yaliyolenga kubaini changamoto zilizojitokeza  kwenye utumiaji  wa mfumo huo yaliyohusisha  wakuu wa idara na vitengo,wakuu wa sehemu,wakuu wa shule za msingi na sekondari,wakuu wa vituo vya afya pamoja na watendaji wa kata katika halamshauri hiyo.

“Nawashukuru kwa ajili ya kushiriki mafunzo haya hili jambo ni la kitaifa na lina maelekezo kwahiyo tuwaombe watumishi muwe ‘serious’ katika hili jambo kwasababu linaenda kugusa maslahi yetu kwahiyo usipotekeleza kuna vitu vitatokea kama kupanda madaraja unaweza kukosa vitu kama hivyo,” amesema.

 Naye Kaimu Mkuu wa Idara ya Utawala na Usimamizi wa Rasilimali Watu, Magdalena Segeja amesema kuwa  hivi sasa kila mtumishi atapimwa kupitia mfumo huo hivyo asipofanya jitihada kuhuisha taarifa zake mfumo utamsoma sifuri kwenye utendaji wake wa kazi.

“Nawahasa sana watumishi wenzangu ni maelekezo ya serikali kuhusu huu mfumo kwa sasa hatuna tena ile OPRAS tuliyokuwa tumezoea kuijaza kwa mkono sasa hivi tunapimwa kwenye mfumo kwahiyo mtu akichukulia uzembe asipojaza taarifa zake mfumo utamsoma sifuri,” amebainisha.