NDOTO ZA RAIS SAMIA NI KUONA HALMASHAURI ZINAJISIMAMIA ZENYEWE

Posted on: February 15th, 2024

Na Mwandishi Wetu

Imeelezwa kuwa ndoto za Rais Samia Suluhu Hassan ni kuona inafika siku halmashuri zote nchini zinasimama  na kuendesha shughuli za kuwaletea wananchi maendeleo pasipo kusubiria ruzuku kutoka serikali kuu.

Mkuu wa Mko wa Kigoma, Thobias Andengenye amebainisha hayo juzi  kwenye kikao kilicholenga kufanya tathimini ya vipaumbele vya bajeti katika halmshauri nane za mkoa huo.

Kikao kilichojumuisha uongozi wa ngazi ya juu ya mkoa huo, wakurugenzi   na wakuu   wa idara na vitengo ili kuangalia ushirikishwaji wa wananchi na kama zinaakisi matakwa yao katika kuwaletea maendeleo.

 Amesema katika mchakato wa bajeti unaoendelea ni lazima liwepo hakikisho  la vyanzo vya mapato vilivyobuniwa  viweze kukusanya vizuri pamoja na kuzuia mianya ya uvujaji wake.

 “Tunaweza kukusanya sana lakini wananchi wangependa kuona kile tulichokusanya kutoka kwao kinawasaidia…ukitumia 40% ya mapato ya ndani kujenga zahanati, madarasa, barabara na hata daraja ambalo limekuwa linawasumbua watu kuvuka itakusaidia kutotumia nguvu kubwa kuelezea namna ulivyotumia mapato yako ya ndani,” amesema.

 Aidha, Andengenye ameitaka Halmshauri  ya Wilaya ya Kasulu kuhakikisha inahamia katika jengo lao jipya la kiutawala ili kuboresha huduma mbalimbali za kiutendaji kwa wananchi.

Naye Mkurugenzi Mtendaji wa Halmashauri ya Wilaya ya Kasulu, Joseph Kashushura amesema kuwa kikao hiko kimesaidia kubadilishana uzoefu wa utendaji kazi na menejimenti za halmshauri zingine kitu kitakachoboresha utendaji kazi.

“Uzoefu tuliuoupata kwa njia ya majadiliano  kama tutaenda kuufanyia kazi katika maeneo yetu utakuwa msaada mkubwa katika kuboresha shughuli mbalimbali katika maeneo yetu ya kazi,” amebainisha.

Pia, ametoa hakikisho ya kutekeleza maelekezo mbalimbali yaliyotolewa na Mkuu wa Mkoa likiwemo la kuhamia katika jengo lao jipya la kiutawala.

“Tumejenga jengo jipya katika halmshauri yetu na sasa tunategemea kuhamia kabla ya mwezi wa tatu kwahiyo agizo hilo tutalitekeleza kama ilivyo ili kuendana na maelekezo yaliyotolewa na Mkuu wa Mkoa,”amebainisha.

Katika hatua nyingine Katibu Tawala wa Mkoa huo, Albert Msovela ameto rai kwa wakurugenzi na wahandisi kufanya tathimini ya fedha zinazotolewa katika ujenzi ni namna gani zinaweza kukidhi matakwa ya utekelezaji wa miradi.

Halmshauri zilizoshiriki kikao hicho ni Kigoma, Kasulu Vijijini, Kasulu Mji,Kibondo,Kakonko, Buhigwe pamoja na Uvinza.