MRADI WA BUHOMA UNAFUNGUA JAMII AKILI NA UWEZO KATIKA KUJILETEA MAENDELEO

Posted on: February 19th, 2024

Na Mwandishi Wetu

Shirika la World Vision kupitia mradi wa Buhoma kwa kutumia mtindo wa Mtazamo Chanya limekuwa linatoa mafunzo kwa jamii  ili kuiwezesha  kufunguka kiakili na kiuwezo  iweze  kuona  fursa mbalimbali zinazowazunguka na kuzifanyia kazi kwa lengo la kuwaletea maendeleo.

 Hayo yamebainishwa wilayani Kasulu mkoani Kigoma hivi karibuni na Mwezeshaji wa Mradi huo, Zablon Choma kwenye kikao cha kufanya tathimini kwa wanufaika wa mradi ni jinsi gani mafunzo waliyopata yameweza kuinufaisha jamii inayowazunguka.

 Amesema mradi huo unafanya kazi kwenye Tarafa ya Makere yenye kata nane na vijiji 10 kwa kushirikiana na serikali ili kutatua changamoto zinazoikabili jamii katika eneo hilo.

“Mwaka jana kwa kushirikiana na viongozi wa serikali tulipata wawakilishi 12 kutoka vijiji 10 na kuwajengea uwezo na baada ya kuwafundisha wakarudi katika vijiji vyao kwenda kufanya mambo mbalimbali katika sekta ya kilimo, ufugaji na biashara,” amebainisha.

Mmoja wa wanufaika wa mradi huo  Evaristo Milagrokasase amesema kupitia mafunzo hayo amepata uelewa kuwa mtu akitaka kufanikiwa si lazima aende mbali bali  awe na uwezo wa kuzitumia kikamilifu fursa zinazomzunguka katika eneo lake la karibu.

“Awali nilikuwa nalima kilimo cha kawaida lakini mwaka uliopita nilipata kujua Pamba ni dhahabu nyeupe hivyo mwaka huu nina mpango wa kulima heka mbili na mahindi tayari nimelima heka saba, na kupata pongezi nyingi kwa namna ninavyoendesha kilimo changu,” amebainisha.

Mnufaika mwingine Emelisiana Manyurane  amebainisha kuwa kupitia shughuli za ufugaji alizoanza kuzifanya  baada ya mafunzo amefanikiwa kusomesha watoto wake wanne na mjukuu mmoja, kujenga nyumba pamoja na kununua kiwanja chenye thamani ya shilingi milioni 1.2.

Naye Afisa Kilimo wa Kata ya Kitagata, Eliud Mteze amesema kuwa jukumu lake katika mradi huo ni kuwaelimisha wakulima kuachana na kilimo cha mazoea na badala yake wahamie katika mtindo ule wa biashara.

“Kwa kutambua hilo nimeanza na vikundi vinavyojihusisha na shughuli hizi kwa kutoa huduma za ushauri bure na pale ninapokutana na mapungufu najitahidi kuwaelimisha ili wafanye kilimo pamoja na ufugaji wenye tija,” amesema.

Akifunga kikao hicho Afisa Maendeleo ya Jamii, Jotham Daniel amesema ufuatiliaji wa yale yote yaliyozungumzwa utaanza  kufanyika hivi karibunii ili kujiridhisha  uhalisia wake kama ni kweli.