KAMATI YA FEDHA YAKUNWA NA UTEKELEZAJI WA MIRADI YA ELIMU

Posted on: March 6th, 2024

Na Mwandishi Wetu 

Kamati ya Fedha, Uongozi na Mipango ya Halmashauri ya Wilaya ya Kasulu mkoani Kigoma hapo jana imefanya ziara kukagua miradi ya maendeleo katika sekta  ya elimu na kuridhishwa  namna jinsi inavyotekelezwa.

Akizungumza wakati wa ziara Makamu Mwenyekiti wa halmshauri hiyo, Laurent Poteza amesema kupitia ukaguzi waliofanya wamejiridhisha kuwa 99% ya miradi waliyopita imeweza kukidhi  vigezo vilivyowekwa.

“Miradi ambayo tumeikagua leo (jana) zaidi ya 99% imekidhi vigezo kwakuwa ipo katika hali nzuri na sehemu za marekebisho tumetoa maelekezo kwa  shule hivyo tunaamini kile tulichokielekeza kitafanyiwa kazi,” amesema.

 Naye Diwani wa Kata ya Kurugongo, Edson Hanyuma  amebainisha  kuwa utekelezaji wa miradi hiyo imewagusa wananchi  kwakuwa siku za nyuma ilipokuwa  inafika mwanzo wa  mwaka wananchi walikuwa wanatakiwa kutoa fedha kwa ajili  ujenzi wa madarasa.

“Namshukuru Rais Samia Suluhu Hassan  ameleta fedha nyingi kwenye ngazi ya halmashauri  nchini kote hasa katika sekta ya elimu kitu kilichosaidia wananchi kuepeukana na michango isiyo ya lazima,” ameongeza.

 Afisa Elimu Sekondari wa  Halmashauri ya Wilaya ya Kasulu, Iyogo Isuja amesema kuwa  utekelezaji wa miradi ya ujenzi mashuleni ukumbana  na changamoto ya vifaa kuchelewa kufika  maeneo ya miradi  hivyo watakabiliana nazo ipate kukamilika kwa wakati.

 Kwa upande wake Muhandisi wa halmashauri hiyo, Valence Philemon amebainisha kuwa  Idara ya Ujenzi imejipanga kuhakikisha miradi inayoendelea kutekelezwa inakamilika  kwa wakati.

Pia, Diwani wa Kata ya Rungwe Mpya, Jonas Abilikaja ameshauri menejimenti ya halmshauri hiyo kuhakikisha ujenzi wa mabweni katika shule ya mchepuo wa kiingereza ya ‘Hope Pre and Primary’ kuanza haraka ili  kuwavutia wateja walioko maeneo ya mbali.

Katika hatua nyingine Afisa Elimu Msingi (Takwimu), Sadick Lugagi amesema kuwa uanzishwaji wa shule ya ‘Hope Pre and Primary’ umelenga kukuza taaluma katika upande mwingine wa mtaala wa masomo unaotumia lugha ya kiingereza.