JIKO MATAWI TIBA YA UHARIBIFU WA MAZINGIRA

Posted on: November 6th, 2024

Na Mwandishi Wetu 

Imeelezwa kuwa utumiaji wa majiko matawi utasaidia kwa kiasi kikubwa utunzaji  wa mazingira kwa kupunguza matumizi ya mkaa na kuni kitu kitakachopelekea uharibifuu wa mazingira uliokithiri   kupungua.

Hayo yamebainishwa leo na Diwani wa Kata ya Rusesa iliyopo Halmshauri ya Wilaya ya Kasulu,Fabiano Dolagi alipokuwa mgeni rasmi wakati wa Uzinduzi wa Kituo cha Majiko Sanifu katika kata hiyo mradi unaofadhiliwa na Shirika lisilo la Kiserikali la NSV.

“Jiko Matawi ni jiko zuri linasaidia kutunza mazingira kwakuwa linatumia mkaa na kuni kidogo,gunia moja la mkaa mtu anaweza kulitumia hadi miezi mitatu ambapo siku za nyuma gunia moja mtu alikuwa analitumia wiki moja au mbili hivyo majiko haya ynatupeleka katika uchumi mzuri,” amesema.

Aidha,Dolagi ameishukuru Divisheni ya Maendeleo ya Jamii katika halmshauri hiyo kwa kuiteua kata anayoiongoza kuwa mojawapo ya kata mbili mradi huo utakapoanza kutekelezwa kati ya 21 zilizopo.

Naye Mratibu wa Progamu ya Mabadiliko ya Tabia SNV Wilaya ya Kasulu,Rozalia Mushi amesema  Ubunifu wa majiko hayo ni njia moajawapo ya kuunga juhudi za serikali katika   utunzaji wa mazingira kwa kuihimiza jamii kuhamia kwenye nishati safi.

Afisa Maendeleo Mwandamizi Halmshauri ya Wilaya ya Kasulu, Subira Swai amesema kuwa  majiko hayo yatapunguza gharama za nishati kwa familia pamoja na kuboresha afya zao hasa mama na mtoto kwa kuwapunguzia adha ya moshi unaotokana na matumizi ya nishati chafu.

Awali akimkaribisha mgeni rasmi Afisa Tarafa ya Buyonga, Paul Ramadhan alibainisha kuwa mradi huo utaenda kutatua tatizo la uharibifu wa mazingira kwa kupunguza  matumizi makubwa  ya kuni na mkaa.