DKT. MPANGO APIGA MARUFUKU WAMAMA WANAOJIFUNGULIA NJE YA VITUO VYA AFYA KUTOZWA FEDHA

Posted on: July 12th, 2024

Na Mwandishi Wetu 

Makamu wa Rais wa Jamuhuri ya Muungano wa Tanzania, Dkt. Philip Mpango amewataka watendaji katika sekta ya afya kuacha kuwatoza  faini  wakinamama waliojifungulia nje ya vituo vinavyotoa huduma hizo ikiwemo kutowalipisha gharama za kadi za kliniki

Dkt. Mpango ametoa agizo hilo leo Ijumaa Julai 12,2024 katika  Kata ya Makere na Nyakitonto zilizopo Halmashauri ya Wilaya ya Kasulu aliposimama kuongea na wananchi wakati wa mwendelezo wa ziara yake mkoani Kigoma.

“Ni marufuku kwa mtumishi yeyote wa afya kuthubutu kumtoza faini mama aliyejifungulia nje ya kituo kinachotoa huduma za afya pamoja na kuwalipisha kadi za kliniki kwa ajili ya mtoto…afisa yeyote atakayebainika kusababisha kero yeye atakuwa kero na hatua dhidi yake zitachukuliwa,” amesema.

Aidha,amehimiza wazazi kuhakikisha wanawapeleka watoto wao shule  na kufuatilia maendeleo  ya wanachojifunza  huko mashuleni ili kusaidia taifa kuzalisha wataalamu wa kada tofauti siku za mbeleni.

Tofauti na hayo kupitia ziara hiyo Dkt. Mpango ameelekeza halmashauri zote kote nchini kutilia mkazo sheria ndogo ndogo za  utunzaji wa mazingira ili kuzuia uharibifu wake kwa watu wanaofanya vitendo hivyo waweze kuchukuliwa hatua.