WATENDAJI WATAKIWA KUHAKIKISHA WAZAZI WANAPELEKA WATOTO KUPATA CHANJO YA POLIO

Posted on: September 21st, 2023

Na Mwandishi Wetu.

Watendaji wa Kata na Vijiji katika Halmashauri ya Wilaya ya Kasulu mkoani Kigoma wametakiwa kuhakikisha wananchi wanawapeleka watoto wenye umri wa chini ya miaka nane kwenda kupata chanjo ya ugonjwa wa Polio.  

Hayo yamebainishwa leo wilayani humo na  Afisa  Usafi na Udhibiti wa Taka wa halmashauri hiyo, Ndelekwa Vanica aliyemwakilisha Mkurugenzi, Joseph Kashushura katika uzinduzi wa kampeni ya kitaifa ya Chanjo ya Polio.

Amesema Serikali kupitia Wizara ya Afya imeona umuhimu wa kuendesha zoezi hilo katika mikoa sita ya Kigoma, Mbeya, Rukwa, Katavi, Songwe na Kagera litakalochukua muda wa siku nne.

“Zoezi hili litafanyika kwa awamu mbili   awamu ya kwanza tunaizindua leo hadi tarehe  24 na awamu ya pili itakuwa mwezi Novemba kwa kuwafikia watu majumbani, kwenye vituo vya afya na maeneo yote ambayo tumeona kuna mkusanyiko wa watu unaojumuisha watoto wadogo,” amesema.

Pia amebainisha kuwa wilaya ya Kasulu imelenga kutoa chanjo hiyo kwa watoto wapatao 176,547 na kuwataka viongozi hao kuhakikisha wanawachukulia hatua watu wote watakaotaka kukwamisha zoezi hilo.

Kwa upande wake Msimamizi wa Kampeni Ngazi ya Mkoa, Dr Godfrey Smart amesema kuwa zoezi hilo limefanyika katika mikoa hiyo baada ya mkoa jirani wa Katavi  mtoto kubainika kuumwa ugonjwa huo.   

Pia amebainisha kuwa  mkoa wa Kigoma umepanga kuwachanja watoto wapatao  884,000 na chanjo hiyo ni salama  kwa kuthibitishwa na Shirika la Afya Duniani (WHO) na Wizara ya Afya.

Naye mmoja wa wananchi walioudhuria tukio hilo, Amina Zekieli akizungumza na mwandishi wetu amesema kuwa amesukumwa kuleta watoto wake kuja kupata chanjo hiyo ili kuwakinga na ulemavu wa kudumu siku za mbeleni.