UWEPO WA OFISI ZA NRFA WILAYANI KASULU UTASAIDIA WAKULIMA KUWA NA UHAKIKA WA SOKO

Posted on: May 5th, 2024

Na Mwandishi Wetu 

Kufunguliwa kwa ofisi za Wakala wa Taifa wa Hifadhi ya Chakula (NRFA) wilayani Kasulu  utatengeneza soko la uhakika la mazao utakaosaidia wakulima kujikomboa kiuchumi hivyo  pato la kaya kuimarika.

Katibu Tawala  wa Wilaya ya Kasulu, Theresia Mtewele ameyabainisha hayo jana  kwenye sherehe ya  siku ya wakulima wa zao la Mpunga zilizofanyika  katika Kijiji cha Titye wilayani humo.

“NRFA mwaka huu itaanza kununua mazao ikiwemo Mpunga tofauti na hapo awali soko lilipokuwa linaendeshwa na wafanyabiashara  tulipokea malalamiko katika masuala ya vipimo hivyo NRFA itazingatia uaminifu  wakulima wasiweze kuibiwa,” amesema.

Aidha, amebainisha kuwa serikali inaendelea na ujenzi wa miundombinu ya umwagiliaji  pamoja na kuhimiza tafiti za mbegu bora zinazoweza kukabiliana na changamoto za kimazingira.

Katika hatua nyingine Theresia  amewapongeza wananchi wa kijiji hicho kwa  kuunganisha nguvu na kutengeneza  miundombinu ya madaraja  ambapo ametoa ahadi ya kuwasiliana na Wakala wa Barabara Vijiji na Mjini  (Tarura) kuifanyia maboresho.

Naye Mkurugenzi -TARI Kihinga, Dkt. Filson Kagimbo amesema  mradi wa urutubishaji wa mazao (NUT-CAT) unafanyika katika nchi kumi barani Afrika kwenye mazao ya Ngano, Mahindi, Mpunga na Teff.

“Kwa hapa Tanzania mradi huu unafanyika katika Mkoa wa Kigoma kwenye wilaya tatu za Kakonko, Kasulu na Kigoma …hapa Kasulu Mahindi tunafanya katika kata za Nyenge, Rusesa na Kwaga huku kwa zao la Mpunga tunafanya katika Skimu ya Umwagiliaji ya Titye,” amesema.

Amesema kupitia tathimini waliyoifanya wamejiridhisha kuwa  mavuno yameongezeka kutoka gunia tano hadi 12 ilivyokuwa awali na kufikia 25 mpaka 31 kwa heka moja.

Mhandisi wa Kilimo Mkoa wa Kigoma, Bathromeo Morice amesema kuwa  kutokana  na wakulima kufuata ushauri wa kitaalam  umesaidia mkoa kupata zawadi ya uzalishaji wa mazao ya Mahindi na Mpunga katika sherehe za Nanenane za mwaka uliopita mkoani Mbeya.

Katika hatua nyingine Mwenyekiti wa Umoja wa Wanawake (UWT) Wilaya ya Kasulu, Everine Reuben  amempongeza Rais wa Jamuhuri ya Muungano wa Tanzania, Mhe. Dkt. Samia Suluhu Hassan kwa namna anavyowawezesha wakulima wa sekta ya umwagiliaji.