KITUO CHA MAJIKO SANIFU CHAZINDULIWA NYAKITONTO

Posted on: November 9th, 2024

Na Mwandishi Wetu

Halmashauri ya Wilaya ya Kasulu mkoani Kigoma kwa kushirikiana na  Shirika la Maendeleo la Uholanzi (NSV) siku ya jana Ijumaa Novemba 8,2024 imezindua Kituo cha Majiko Sanifu katika Kata ya Nyakitonto.

Kama   njia mojawapo ya kupunguza utumiaji wa nishati chafu za kuni na mkaa ili kukabiliana uharibifu wa mazingira kwa kutumia Majiko Matawi.

Akizungumza wakati wa tukio hilo Diwani wa Kata hiyo, Daniel Mzababa  amesema kuwa  faida  kubwa ya utumiaji wa majiko hayo ni kutumia matawi badala ya kuni na mkaa kidogo kitu kitakachopelekea ukataji miti kiholela kupungua.

“Kata hii ya Nyakitonto ni kubwa na ina athari kubwa kwenye ukataji wa miti   hivyo tukitumia majiko haya sanifu maana yake tumeokoa vizazi vya sasa na vile vinavyokuja  kwakuwa ukataji miti ovyo utapungua,” amesema.

 Kwa upande wake Mratibu wa Programu ya Mabadiliko ya Tabia SNV,Rozalia Mushi amesema kuwa lengo lao ni kuzihamisha familia kutoka kutumia mafiga matatu na  likifanikiwa   elimu itatolewa  zaidi ya matumizi ya nishati safi ya gesi na umeme ili kukabiliana na uharibifu wa mazingira.  

Naye Afisa Misitu na Ufuatiliaji wa Matumizi ya Nishati Safi wa Mradi huo, Hassani Omari amebainisha kuwa kuanzia mwaka 2024 hadi 2034 serikali ina mpango kabambe wa kuondoa nishati taka hivyo kupitia matumizi ya majiko hayo anaona kufanikiwa kwake.