WAZIRI MKUU AFANYA ZIARA KASULU

Posted on: July 30th, 2018

Na.Andrew Mlama.

Waziri Mkuu Kasim Majaliwa (MB) amefanya ziara mjini kasulu ambapo amepokelewa na kuzungumza na wakazi wa maeneo mbalimbali ya mji na wilaya ya Kasulu.

Akizungumza na wakazi hao, waziri Majaliwa amewataka wananchi kuendelea kuwaamini viongozi wao katika utekelezaji wa Ilani ya Chama Cha Mapinduzi unaofanywa na Serikali ya awamu ya tano inayoongozwa na Mh.Rais John Pombe Magufuli.

Ameeleza kuwa, Serikali haitosita kuwachukulia hatua watumishi wa umma walio wazembe  na kuwataka wahakikishe wanatumia siku tatu kati ya tano za kazi kwa kwenda maeneo walipo wananchi ili kuwasiliza na kutatua kero zao pamoja na migogoro badala ya kushinda ofisini.

Amesisitiza kuendelea kuboresha huduma ya maji katika mji wa Kasulu kutokana na kukua  kwa kasi na kuhitaji huduma hiyo kwa kiasi kikubwa na uhakika. Aidha utekelezaji wa kurekebisha miundo mbinu ya barabara za mji kwa kiwango cha lami, zenye urefu wa km 6 unaendelea.

Amesema suala la usambazaji wa umeme, Serikali imedhamiria kila nyumba ya mtanzania itapata  umeme kwa kupunguza gharama za uwekaji huduma hiyo  toka Shilingi 380,000  mpaka 27,000 tu. Aidha Amesisitiza kutoendelea kwa gharanma za kulipia nguzo za umeme ambapo amefafanua kuwa jukumu hilo litabebwa na  serikali sio mwananchi.

Amewataka wajumbe wa kamati ya ulinzi na usalama kushirikiana na taasisi zinazohusika kudhibiti mipaka ili kuzuia wimbi la wahamiaji haramu kutoka nchi  ya Burundi wanaoingia nchini kinyume  na sheria pia kuingiza silaha. Udhibiti huo ufanyike kwa wafanyabiashara pia ili walipe ushuru wanapotoa na kuingiza bidhaa nchini.

Waziri mkuu ameahidi kurudi mkoani hapa tarehe 30.09.2018 ili kufuatilia utekelezaji wa maagizo yake pia  kuzunguukia wilaya ambazo hajazitembelea ili kujionea utekelezaji wa miradi mbalimbali hususani  wilaya ya kasulu vijijini, Kibondo na Kakonko.