WASHIRIKI WA MAFUNZO WAFAGILIA JKZ ITAKAVYOKWENDA KUTATUA CHANGAMOTO ZA KITAALUMA

Posted on: January 29th, 2025

Na Mwandishi Wetu, Kasulu

Washiriki wa Mafunzo ya Jumuiya za Kujifunza kwa Walimu Wakuu na Maafisa Elimu Kata (JKZ) wamesema mafunzo hayo yatawaongeza kwa kiasi kikubwa ufanisi kwenye suala zima la ufundishaji na ujifunzaji katika maeneo yao ya kazi.

Akizungumza wakati wa ufungaji wa mafunzo hayo katika Chuo Cha Ualimu Kabanga kilichopo wilayani Kasulu  mkoani Kigoma Mwalimu Mkuu wa Shule ya Msingi Muhanga,Yuster Chengula amesema kuwa mafunzo hayo yamempa weledi wa namna ya kutatua changamoto mbalimbali za kitaaluma kwenye eneo lake la kazi.

“Kwa sasa kupitia JKZ tulizounda imeniongezea weledi wa namna ya kusimamia shule hasa kwenye utatuzi wa changamoto zinazojitokeza kwenye ujifunzaji na ufundishaji ili kufikia malengo ya Dira ya Elimu ya mwaka 2025,” amesema.

Naye Afisa Elimu wa Kata ya Titye, Yoabu Henyura amesema timu zao walizoziunda zitasaidia kutatua matatizo sugu likiwemo suala la utoro kutoka kwa timu zingine kuona ni namna gani walivyoweza kukabiliana nazo.

Awali akizungumza katika tukio hilo Mwezeshaji Kiongozi,Japhet Kidawi amesema kuwa msisitizo uwekwe kwa kila timu kwenye suala la kukutana  kwa mwaka mara nne ili kujengeana uwezo kwenye suala zima la ujifunzaji na ufundishaji.

“Malengo ya kuunda timu ni kujengeana uwezo ili mtu akipata tatizo ajue anaenda wapi… kitu hiki nina hakika kitachochea suala la ufaulu kwakuwa mambo ya ujifunzaji na ufundishaji yataboresheka,” amesema.

_