UKARABATI WA MIUNDOMBINU YA MAJI RUSESA NA KWAGA KUANZA

Posted on: March 24th, 2018

Na. Andrew Mlama.

Ukarabati wa Miundombinu ya maji katika kata za Rusesa na Kwaga unatarajiwa kuanza hivi karibuni.

Ukarabati huo unatokana  na uharibifu wa miundombinu ya maji uliofanywa na Mkandarasi anayefanyakazi ya ujenzi wa barabara kwa kiwango cha lami  kutoka Kidahwe mpaka Kasulu mjini.

Mabomba yakiwa kwenye lori tayari kwa kushushwa ili utendaji kazi uanze mara moja. Mabomba hayo yamehifadhiwa katika Kituo cha afya Rusesa.          

Diwani wa kata ya  Kwaga Mh. Baraka Mkuyu, amethibitisha kupokelewa kwa mabomba 620 ambayo yatatumika katika kurudishia mfumo huo ulioharibiwa.

“Kero ya upatikanaji wa Maji safi katika kata ya Kwaga  imekuwa ni ya muda mrefu hivyo ukarabati huu utakapokamilika utaamsha ari ya maendeleo kwa wananchi wa kata hii.” alisema Mkuyu.

Nao wananchi  wa kata ya Kwaga wameushukuru uongozi wa Kata hiyo pamoja na Halmashauri kwaujumla kwa kuhakikisha ukarabati huo unafanyika na huduma ya maji inarejea katani hapo.

“Tumekuwa na changamoto ya upatikanaji maji safi pia wanawake na watoto wamekuwa wakitumia muda mwingi  kufuata maji mtoni.”  walisema wakazi wa kata ya Kwaga. 

Ulazwaji wa mabomba na taratibu za kiufundi zinatarajiwa kuanza muda wowote kuanzia sasa ili huduma hiyo muhimu iweze kurejea tena katani hapo.