SERIKALI YAHAMASISHA MASHIRIKA YASIYO YA KISERIKALI KUSHIRIKIANA NAYO SUALA LA LISHE

Posted on: July 16th, 2024

Na Mwandishi Wetu 

Mashirika yasiyo ya kiserikali wilayani Kasulu mkoani Kigoma yamehimizwa kushirikiana na serikali katika kuhakikisha suala la lishe bora linazingatiwa mashuleni.

Katibu Tawala wa Wilaya ya Kasulu, Theresia Mtelewe  aliyemwakilisha Mkuu wa Wilaya hiyo, Mhe. Kanali Isaac Mwakisu ametoa wito huo  leo Jumanne Julai 16, 2024 wakati wa Kikao cha  Taasisi Zisizo za Serikali kilichofanyika katika Ukumbi wa Mikutano wa Halmashauri ya Mji wa Kasulu.

“Tumeendelea kujikita katika masuala ya afya na lishe mashuleni wakati mwingine tunapata ukinzani kutoka kwa wazazi kwakuwa ni kitu kipya… nyinyi mpo mshirikiane na serikali kwa kutembelea hizi ofisi kuona ni namna gani mnaweza kuwashawishi watoto wetu waendelee kupata lishe bora,” amesema.

Aidha, ameyataka mashirika hayo kutoa taarifa sahihi kwa serikali pale zinapohitajika na kusisitiza miradi wanayotegemea kuitekeleza ifanyike sehemu zenye mahitaji, malengo na vipaumbele vya taifa.

Na kuongeza kuwa serikali haitosita kuchukua hatua kwa taasisi ambayo itakuwa inafanya mambo ambayo hayaendani na mila, tamaduni na desturi za mtanzania.

Kamanda wa Taasisi ya Kuzuia na Kupambana na Rushwa (TAKUKURU) Wilaya ya Kasulu, Elimiliki Kihundrwa ametoa wito kwa taasisi hizo kupeleka habari kwa jamii kuacha kushusha thamani ya utu wao kwa kuwaomba wagombea rushwa.