SERA ENDELEVU CHACHU YA KUDUMU KWA MUUNGANO

Posted on: April 26th, 2024

Na Waandishi Wetu

Imeelezwa kuwa  Tanzania imeweza kufikisha miaka 60 ya Muungano  kutokana na awamu zote za utawala kuwa na sera endelevu kwa kufuatilia kwa karibu changamoto zinazojitokeza na  kuzipatia ufumbuzi.

Mkuu wa Mkoa wa Kigoma, Mhe. Thobias Andengenye ameyabainisha hayo leo wakati wa kilele cha maadhimisho  ya sherehe ya miaka 60 ya Muungano ambayo kimkoa yalifanyika katika Uwanja wa Umoja wilayani Kasulu.

“Kupitia Muungano wetu sote ni mashahidi kwamba uchumi wetu umeendelea kuimarika siku hadi siku kutokana  na mazingira na mahusiano mazuri yaliyowekwa na viongozi wetu,” amesema.

Aidha, Andengenye amempongeza Rais wa Jamuhuri ya Muungano wa Tanzania, Mhe. Samia Suluhu Hassan pamoja na wa Zanzibar, Mhe. Dkt. Hussein Mwinyi kwa kazi kubwa wanayoifanya ya kuhakikisha wananchi wanapata maendeleo.

Naye Katibu Tawala wa Mkoa wa Kigoma, Hassan Rugwa amesema kuwa katika miaka 60 ya Muungano serikali imeweza kuimarisha   huduma za afya kwa kuboresha miundombinu pamoja na kuwekeza katika vifaa tiba vya kisasa.

“Mkoa wa Kigoma kabla ya miaka 60 ya Muungano tulikuwa na vituo vya afya visivyozidi 11 lakini hivi sasa tuna vituo vya kutolea huduma hizo zaidi ya 230 vinavyojumuisha Hospitali ya Rufaa moja, hospitali za wilaya zaidi ya nane pamoja na vituo vya afya na zahanati zaidi ya 200,” amesema.

Awali akizungumza katika sherehe hizo Mkuu wa Wilaya ya Kasulu, Mhe. Kanali Isaac Mwakisu amesema katika miaka 60 ya Muungano kumekuwa na manufaa mengi ikiwemo kutokuwepo na ubaguzi wa mipaka baina ya Zanzibar na Tanzania Bara.