NeST IMEONGEZA UWAZI KATIKA MCHAKATO WA MANUNUZI

Posted on: May 8th, 2024

• Na Mwandishi Wetu

Imeelezwa kuwa Mfumo wa Manunuzi wa Umma (NeST) ulianzishwa ili kusaidia kudhibiti  kuchelewa na kuongeza uwazi wakati wa mchakato wa zabuni.

Kaimu Meneja wa Mamlaka ya Usimamizi wa Manunuzi ya Umma (PPRA) Kanda ya Kati, Mhandisi Suma  Atupele ameyasema hayo leo  alipokutana na wakuu wa idara, vitengo na watendaji wa Kitengo cha Usimamizi wa Manunuzi na Ugavi wa Halmshauri ya Wilaya ya Kasulu.

Ambapo  amewataka wakuu wa idara na vitengo pamoja na watu walio chini yao kuhakikisha mchakato wa manunuzi wanaufanya wao wenyewe na kukemea tabia ya utoaji  wa nywila ili  waweze kufanyiwa shughuli hizo.

“Hii mifumo ni mipya  maadamu umepewa akaunti useme sijuhi  uelekezwe utajua taratibu na si kumuachia nywila yako mtu anayehusika na manunuzi,” amesema.

Naye  Kaimu Mkurugenzi wa halmashauri hiyo, Magdalena Segeja amesema kuwa utendaji kazi serikalini unapoelekea itafika kipindi matumizi ya karatasi yatafikia kikomo na kuwataka wakuu wa idara na vitengo kutilia mkazo suala la kufahamu mifumo.

Mkuu wa Kitengo cha Usimamizi wa Manunuzi na Ugavi, Gwamaka Panja amebainisha changamoto ya mfumo kutotambua baadhi ya wazabuni wanapotangaza kazi.

Kwa upande wake Afisa Ugavi na Ununuzi, Ezekiel Badeleya amesema kuwa mfumo huo umeongeza uwazi na uwajibikaji lakini halmashauri uwa inakwama inapotaka kuuza au kukodisha kitu.