ELIMU YA URAIA CHACHU YA MABADILIKO

Posted on: January 30th, 2025

Na Waandishi Wetu,Kasulu

Imeelezwa kuwa elimu ya uraia pamoja na uzingatiwaji wa misingi ya utawala bora ni chachu ya kuleta mabadiliko kwenye uongozi linapokuja suala la usimamizi wa vitu hivyo kwa watu unaowaongoza.

Mkuu wa Wilaya ya Kasulu,Mhe. Kanali Isaac Mwakisu amebainisha hayo leo wilayani humo  wakati akifungua Mafunzo ya Uraia na Utawala Bora kwa Viongozi wa Serikali za Mitaa yaliyoratibiwa na Wizara ya Katiba na Sheria.

“Ujuzi utakaopatikana hapa utawawezesha kutekeleza majukumu yenu kwa kuzingatia haki za binadamu,utawala bora,maadili na miiko ya uongozi kwa mujibu wa sheria na taratibu zilizopo na kile mtakachokielewa muende kushirikisha watu walio chini yenu mnaowaongoza,” amesema.

Aidha, Kanali Mwakisu amewaomba wawezeshaji wa mafunzo hayo kutilia mkazo suala la utatuzi wa migogoro ya ardhi kwakuwa matatizo mengi yaliyopo wilayani humo yanagusa jambo hilo hivyo ni vizuri washiriki wapewe mwanga wa  jinsi ya kukabiliana nayo.

Naye Wakili wa Serikali ambaye pia ni Mratibu wa Mafunzo hayo, Joyce Mushi amesema kuwa lengo la kutoa elimu hiyo ni kuboresha utendaji kazi  uweze kuzingatia haki za binadamu na utawala bora,kukuza demokrasia pamoja na kuimarisha suala la ulinzi na usalama.

Mwezeshaji Mwingine,  Yohana Mcharo amewataka washiriki kuakisi dhana ya uwazi  kwa kuacha kukalia taarifa ambazo wananchi wanatakiwa kuzipata ikiwemo magonjwa ya milipuko,miradi ya maendeleo au kama kuna kiatarishi chochote.